Con hopi nos muchanan sa di Betico Croes?
Den conexion cu celebracion di Dia Di Betico, CMB a dicidi di haci algo un poco diferente e
aña aki. Nos a invita algun muchanan pa bini hunto y puntra nan algun pregunta
tocante Betico manera si nan sa ken e ta, kico el a yega di logra, y pakico nos ta celebra
Dia di Betico na prome luga. E contestanan tabata diverso y hopi cute. Demasiado cute,
honestamente.
Varios di e muchanan a contesta nan preguntanan cu hopi entusiasmo y tabata tin otronan
cu a mustra un poco confundi den kico nan kier a contesta, of simplemente no tabata sa.
Locual ta hopi leuk pa mira tambe ta cu nos muchanan ta reconoce cu di berdad Betico
Croes ta un figura hopi importante pa nos isla. Ta esencial pa na cas y na nos scolnan nos
pone un poco mas enfasis riba e momentonan aki di nos historia pa nos muchanan por
siña mas tocante nan mesun hendenan, pa nan wordo inspira por medio di nan mesun
lidernan. Cu e video aki nos ta refleha riba esaki y na mes momento honrando nos
libertador su gran lucha pa hiba nos pais dilanti pa e siguiente generacionnan por sigui
disfruta di dje.
Un causa sagrado
Gilberto François “Betico” Croes a nace na Santa Cruz riba 25 di Januari, 1938. Despues di
a caba su scol na Aruba, el a bay Hulanda y studia na Hilversum Teachers Training College.
Na 1959 el a obtene su certificado di Hoofd Meester, y ora el a bin bek Aruba el a cuminsa
duna les na Sint Jozef School y Antonius College na Santa Cruz. Tabata na aña 1967 unda
cu e carera politico di Betico a cuminsa, inicialmente como miembro di Arubaanse Volks
Partij [AVP]. Despues na 1971 el a funda Movimiento Electoral di Pueblo [MEP] na unda e
tabata presidente y lider di e partido te na su fayecimento. Como politico, Betico a dedica
su mes specialmente na e determinacion propio di e comunidad Arubano, y na aña 1976 el
a tuma e iniciativa pa adopta un bandera Arubano hunto cu un himno. No mucho largo
despues manera nos conoce, a bini e logro di Aruba su Status Aparte.
Pa Betico, su mission di yuda Aruba tabata hopi mas grandi. Bo tabata sa cu e tabata
considera esaki un ‘causa sagrado’? Na bida, e tabata bisa cu e no tabata tin miedo di
nada pa por a yega na e causa sagrado aki pa nos pueblo, caminda el a enfrenta diferente
obstaculo den diferente manera y semper a lucha pa sobresali pa su mes, pa su partido, y
specialmente pa su hendenan y su pueblo tan stima, Aruba.
Feliz Dia Di Betico!