Fundacion Respeta Mi ta haya cu ta importante pa trece algun punto dilanti den conexion cu e momentonan dificil aki cu nos ta bibando actualmente durante e crisis di COVID-19, mirando cu tog tin un cambio, y pues e risico pa abuso di mucha t’ey.  Awor por ehempel cu e muchanan ta den circumstancianan cu nan ta mayoria di biaha na cas. Jeanmiree van der Werf di ‘Fundacion Respeta Mi’ ta bisa cu esaki por ta algo bon, mirando cu lo tin mas bista riba e muchanan. Sinembargo, Jeanmiree ta expresa cu esaki por ta algo menos bon tambe pa muchanan cu mastanto por ehempel na scol nan tabata sinti nan mes mas sigur. “Hopi biaha ora nos duna charla, nos ta bisa e muchanan pa acerca un persona di confiansa, un adulto cu bo por confia den caso cu bo mester di ayudo”, Jeanmiree ta remarka. Fundacion Respeta Mi ta haya cu bisiñanan awor mester bay hunga un rol importante den esaki. Esaki no ta bay pa ‘biba bida di hende’ of haci redo. Abo como bisiña hopi biaha bo por señala hopi cos, y den e caso aki, nos ta papiando den e bienestar di un mucha cu kisas lo tin mester di bo ayudo na por ehempel señala cosnan cu ta mira pasando pafo y no necesariamente paden di e hogar.

‘Si bo wak algo, bisa algo, haci algo!’
Tin ora stress ta hunga un rol importante of factor di risico na unda muchanan por experiencia abuso fisico, abuso verbal of negligencia. Si e stress tog ta un tiki bao control y mayornan por señala un situacion caminda cu ta tuma nota cu e ta birando dimas, pa por tin e abilidad pa parti e tarea na cas y ta dispuesto pa pidi sosten for di instancianan. 

Aruba tin hopi instancia cu por yuda den e parti di educacion di e mucha, diferente fundacion pa yuda e muchanan, y pa yuda mayornan por ehempel den consehonan di lanta mucha. 


Abuso sexual ta un otro asunto. Si abuso ta pasando den e cas, ta logico cu nan lo haci e publico y bisiñanan no lo por señala esaki facilmente. “Abuso sexual ta super scondi, e ta dificil pa señala, pero bo mester keda alerta”, Jeanmiree ta expresa.

Si bo wak algo, bisa algo, haci algo. No lag’e scondi. E bienestar di nos muchanan ta asunto di tur hende. E mester bira un responsabilidad di comunidad. Bo tin cu informa bo mes tocante abuso y bienestar di mucha: informa, señala y actua.

Mayoria di biaha preguntanan manera: ‘Unda mi por bay pa raporta un caso di abuso?’ of ‘Kico mi por haci?’ ta resona den comunidad, y ta pa e motibo aki Fundacion Respeta Mi ta haya hopi importante pa sigui traha incansablemente duro riba un di nan metanan di mas grandi, cual ta prevencion. Por medio di conscientisacion, papiando habri cu otro, siñando for di con otro paisnan ta atende cu e temanan aki, y specialmente trahando hunto, Fundacion Respeta Mi ta mas cu sigur cu asina poco poco nos por cuminsa na resolve e problemanan social aki riba nos isla.

E tema di sexualidad segun e Fundacion, ta keda un tema hopi taboo riba su mes na Aruba ainda. Pues, e importancia di conscientisacion ta awe hopi mas grandi, apesar cu nos ta biba den un era di informacion, na unda cu nos por haya tur clase di informacion, ki ora cu nos mester. Fundacion Respeta Mi ta haya sumamente importante pa dialogo keda riba mesa, y no solamente despues cu un caso lamentabel ta sosode.



Fundacion Respeta mi ta un fundacion cu ta boga pa sosten pa asina nan por sigui na sostene nos comunidad. Cu fondo y apoyo adecua, un fundacion manera esaki por haci cosnan manera trece expertonan profesional di exterior pa duna charla y tayer na un otro nivel, y asina stimula y inspira nos comunidad.


E fundacion ta tin su oficina na Dominicanessenstraat 12 caminda bo por pasa libremente pa mas informacion entre dialuna pa diabierna, di 8’or di mainta pa 5’or di atardi non-stop.Nan number di telefon ta (+297) 582-4433 y nan coreo electronico ta: respetami@setarnet.aw. Tambe bo por sigui nan riba nan Facebook ‘Fundacion Respeta Mi’ pa mas informacion.


Like it? Share with your friends!