Con nos lo salba nos muchanan? Conscientisacion, prevencion, y comunicacion.

Segun nos por mira den nos medionan di comunicacion y rednan social, e problemanan social na Aruba den conexion cu abuso di mucha ta alarmente. E ta keda bini pa dilanti, caso tras di caso.
Ta pa e motibo aki, CMB a acerca “Fundacion Respeta Mi” pa asina hunto crea un cooperacion den yuda conscientisa nos comunidad tocante un tema social hopi real den nos sociedad.

E tema di abuso di mucha ta uno hopi sensitivo, cu hopi emocion su tras cada bes nos mira un otro caso bini pa dilanti. Por medio di mas conscientisacion, hunto cu e trabaonan duro cu “Fundacion Respeta Mi” ta haci, lo por crea mas dialogo y accionnan pa preveni abuso di mucha.

Tin biaha, bo djis mester di un man. E informacion corecto ta haci un diferencia, anto ora esaki ta bini for di hendenan cu kier yuda, y di curason ta lanta tur dia pa atende cu e problemanan aki, ta algo di admira, pasobra e ta un yudansa honesto.

Na 2010, trahadornan social na Aruba a señala cu tin diferente tipo di abuso di mucha tumando luga riba nos isla, entre otro, e abuso fisico, emocional, testigo di violencia domestico y mas. Aki a cuminsa na fortifica e trabaonan pa combati e fenomenonan aki. Por medio di bishita diferente scol, dunando diferente charla y tayer na maestronan, “Fundacion Respeta Mi” ta haci nan esfuerso pa contribui na e lucha pa stop cu abuso di mucha.
E fundacion a tuma nota cu ora ta trata di papia tocante e temanan aki, hopi hende ta ‘cera nan mes’. Nan no kier scucha, of e comunicacion non-verbal ta cambia. Hende sa kico tur ta pasa realmente, pero,e realidad ta cu e ta keda un tema fastioso tambe pa hende toca. Unda “Fundacion Respeta Mi” kier hunga un rol hopi importante ta na e parti di conscientisacion, brindando herment y informacion riba kico por haci pa preveni abuso di mucha.

Bo a mira algo? Papia, bisa algo.
Proteha nos muchanan manera cu nan merece di wordo protehi. Esaki ta e punto tras di henter e iniciativanan aki, e base for di unda “Fundacion Respeta Mi” ta eherce nan trabaonan incansablemente. E unico manera pa realmente salba nos muchanan.

E fundacion ta enfatisa na conscientisa nos hobennan y muchanan, buscando semper maneranan nobo y adecua pa trece e informacion na nan. Abuso di mucha ta un tabu riba su mes cu e fundacion ta haya cu a yega ora nos trata cu ne un poco diferente, y simplemente cuminsa dialoga y comunica cu otro.

E fundacion ta tin su oficina na Dominicanessenstraat 12 caminda bo por pasa libremente pa mas informacion entre dialuna pa diabierna, di 8’or di mainta pa 5’or di atardi non-stop.

Nan number di telefon ta (+297) 582-4433 y nan coreo electronico ta: respetami@setarnet.aw. Tambe bo por sigui nan riba nan Facebook ‘Fundacion Respeta Mi’ pa mas informacion.


Like it? Share with your friends!

-1
826 shares, -1 points