Simpatia y optimismo

https://youtu.be/cxLeu2Jal9I

‘Durante temponan di crisis, ta importante con ta eherce y expresa liderazgo’
Durante temponan di crisis manera nos ta enfrenta nos mes awe cu Covi19, Philippe La Reine, Senior Account Manager na Caribbean Mercantile Bank N.V. ta bisa cu e no ta kere cu e temponan cu nos ta pasa aden di nan mes ta haci cambio den e definicion di liderazgo. Sinembargo, si e ta haci un cambio den e manera con liderazgo ta wordo eherce y expresa.

Philippe ta haya cu un di e factornan di mas importante di liderazgo den e temponan cu nos ta bibando aworakinan, ta simpatia y optimismo.
 Simpatia pasobra pa cada un di nos ta dificil pa compronde con lihe tur esaki a cambia nos bida, pero mas dificil ainda pa compronde ta e magnitud, e impacto cu esaki tin riba cada un di nos. Tumando un ehempel chikito y simpel kisas, Philippe ta mira su yiunan por ehempel, unda antes tur mainta den siman ta bay scol, topa nan amigonan, bay tekenles, muziekles, y diferente actividadnan cu ta tene nan bezig cu nan ta gusta haci. “Actividadnan cu nan ta orguyoso di nan ora nos t’ey pa aplaudi nan, tur esaki no ta posibel mas. E ta dificil pa compronde tin e ora e impacto cu esaki por tin hasta riba e mucha.”

Na mes momento, nos tin negoshinan cu ta cerando, hendenan cu ta perde trabao, hendenan cu ta insigur riba con lo para cu nan entrada. Tur esaki ta rekeri comprendimento y simpatia. Si bay bek na ora cu a wordo dicidi riba ceramento di frontera, y bay na dos dia despues, un Dialuna mainta, tur Senior Management di CMB a bini hunto y dicidi como prome banco pa duna un moratorio ‘across the border’, pa tres luna largo. Pasobra bo mester por compronde cu pa hende, e ta bay tuma un reset pa nan por compronde con nan ta bay restructura nan bida. 

Y awor, optimismo. Pa tin optimismo, aunke cu e ta dificil den e temponan aki pa eherce un concepto asina, tog Philippe ta pensa cu optimismo ta increiblemente importante. Pasobra cu similar na fe, optimismo ta pa un 99% sigur un escogencia. Phillippe: “Y si nos kies pa ta optimista riba locual cu lo bini despues cu nos gana e virus, pasobra nos lo gana e virus, y nos ta optimista y keda optimista di su mes caba ta un gran paso pa dilanti pa nos por haci e trabao mes di restructura tur cual nos a perde.”

Ta obvio si cu optimismo no ta suficiente pa recupera. Pero liderazgo den temponan fastioso manera un pandemia mundial cu nos ta experienciando na momentonan aki,  tambe ta rekeri cu cada un di nos, den nos manera y den nos hogar, ta eherce liderazgo por medio di expresa humildad. Tuma responsabilidad y compromete nos mes cu lealtad na otro. Esaki no ta tempo pa bringa otro of pa cuestiona decisionnan cu a wordo tuma, unda kisas ami of abo ta pensa lo por tin un miho solucion.


Nos mag di ta critico, claro. Pero esaki ta temponan pa nos ta leal na otro, y tuma responsabilidad y haci locual cu ta den e bienestar general.


E ta un tempo pa lidernan expresa cu nos tin cu cuida otro, y percura pa hunto nos traha riba no solamente recupera, pero pa tende tur hende sano y salbo di e virus aki cu nos ta experienca awor.

Liderazgo no tin nada di haber cu con bo ta stuur hende, dirigi hende, dicidi pa hende, of con bo ta move 
diferente popchinan den e veld. Philippe ta reconoce cu liderazgo tin hopi mas di haber ta con bo ta maneha bo mes. Esaki ta e prome parti di liderazgo; ora bo conoce bo mes y bo realiza kico ta bo puntonan fuerte, manera tambe bo puntonan menos fuerte. Na momento cu bo sa maneha bo mes, bo ta bay un paso mas dilanti na con bo por inspira otro hende pa nan sigui den e pasonan y direccion cu abo ta bay.

Tambe, pa bo tin un efecto positivo den bo comunidad y bo famia, ta un otro stap mas leu cu bo ta yega den reconoce kico realmente ta nifica liderazgo. E ta algo cu bo ta siña continuamente, na unda bo ta topa cu un hende tur dia den bo bida cu ta siña bo algo pa bo sigui amplia bo conocemento, y nunca stop di crece.

Disfruta di un tiki di Philippe su storia y perspectiva di liderazgo den ‘Philippe The Movie’ , cual a wordo filma y produci prome cu e crisis di COVID-19 a inicia.


Like it? Share with your friends!

0
3 shares